"Yupela i ken malolo liklik."

Long Gutnius (Mak i raitim, 6: 30-34) yumi harim sampela gutpela edvais Jisas i laik givim long yumi.  Na tu, Jisas i skulim yumi long pasin blong em taim yumi gat nid long en.

Yumi harim oslem ol aposel i kam bek long bikpela wokabaut blong ol – we Jisas i ben salim ol i go blong autim Gutnius.  Ol i stori long ol wok ol i bin mekim na long olgeta tok i bin givim long ol manmeri.  Bihain dispela bikpela misin ol aposel i tait pinis na ol i laik malolo – tasol planti manmeri i wok long i go i kam.  Na Jisas wantaim ol aposel i no gat taim blong kaikai!  Jisas i save ol aposel i nidim sampela taim blong malolo na em i marimari long ol aposel blong em.  Em e tok olsem:  “Yumi tasol i go long wanpela  hap i no gat man, na bai yupela i ken malolo liklik”.  Na ol i amamas na ol i kisim bot i go long wanpela hap i no gat man.

Ol bratasusa, planti taim yumi save bisi long planti samting: long wok gaden, long wok opis, long wok, skul, long wok family – long kainkain wok yumi save mekim.  Tasol, Jisas i laik marimari long yumi tu – olsem em i bin mekim wantaim ol aposel blong em.  Na em i singautim yumi bai yumi go wantaim em bilong malolo.  Taim yumi save lotu o pre o ritim Buk Baibel, yumi bihainim dispela tok bilong Jisas.  Yumi malolo wantaim Jisas.  Sapos yumi mekim olsem, orait yumi bai bel isi long laip na sindaun blong yumi.

Jisas i laik bai ol pren bilong em i malolo ol wan wan taim... tasol em yet i no save malolo, nogat.  Long dispela hap Gutnius (Mak i raitim) yumi harim olsem ol manmeri blong olgeta taun i ran i go long dispela hap ol lain bilong Jisas i laik i go long en, na ol i kamap paslain long Jisas.  Tasol Jisas i no rausim ol na tokim ol i mas i kam bek tumora, nogat.  Jisas i sori tru long ol bikos ol i olsem sipsip i not gat wasman.  Na em i stat long givim planti tok long ol.

Jisas i save yumi mas malolo ol wan wan taim – tasol Jisas, nogat.  Em i stap redi oltaim blong harim pre bilong yumi.  Yumi no ken wari – Jisa i stap oltaim redi long helpim yumi taim yumi gat nid long em.

Jisas, em i gutpela wasman blong yumi ol sipsip blong banis blong em.


(Dispela em i skul mi bin givim long ol bilipmanmeri blong Ekari, Upper Mendi, 22 July 2012.)